சருகுகளின்_சபலங்கள்
பகுதி - 39
எட்டி நில்லுங்கள்
வணக்கம்மும்பையில் எனது இந்த வார பதிப்பு
பெண் ஏமாறுவது மட்டும் இல்லாமல் அதற்கான தண்டனையையும் அவள் மட்டுமே அதீதமாய் பெறுகிறாள்.
உடலளவில் மட்டுமின்றி மனதளவிலும்.
உடலளவில் என்கையில் அவள் தாய்மை ஆகும் வாய்ப்பும் மனதளவில் எப்போது ஒருவனுக்கு தன்னை ஆள அனுமதிக் கொடுக்கிறாளோ அப்போதிலிருந்து அவனை முழுமையாக நம்ப ஆரம்பிக்கிறாள். ஆக பிரிவென்று வருகையில் ஆணை விட பெண் அதிகம் தவிக்கிறாள், துவண்டு போகிறாள், தன் உயிரையும் நீக்கவும் துணிகிறாள்.
ஆணின் காதலும் தேடலும் பெண் உடல் கிடைத்து அவன் இச்சை அடங்கும் வரை தான். அவள் மனம் இசைந்து உடல் கிடைக்க அவள் பின்னே நா*யாய் பே*யாய் பலர் பார்க்க லச்சையின்றி திரியவும் செய்வான்.
இதில் அவனுக்கு திருமணமாகிவிட்டது, அவளுக்கு திருமணமாகிவிட்டது என்ற எந்த ஒரு காரணம் இருந்தாலும் கூட அவனுக்கு தேவை என்றால் அவை இரண்டாம் பட்சம் தான்.
இத்தனை கொண்டாடுகிறானே, இத்தனை அன்பு செலுத்துகிறானே, இத்தனை ஆதூரமாக துன்பக்காலங்களில் எவர் நிற்பதற்கு முன்பும் பக்கபலமாக நிற்கின்றானே என்ற நம்பிக்கையில் அவள் அவளை தன்னை மீறி தர தயாராவள்.
இருந்தாலும் பற்பல தயக்கங்கள் அவனிடம் இருந்து அவள் ஒதுங்கி நிற்பாள். இந்த ஒதுக்கத்தை அவள் விலகலை உடைக்க வேட்டை குணம் கொண்ட ஆணுக்கு பிடிக்கும். தானாய் தரும் பெண்ணை விட முரட்டுத்தனமாய் மறுக்கும் பெண்ணின் நம்பிக்கையைப் பெற்று அவளை வீழ்த்துவதும் பயன்படுத்திவிட்டு அவளை அவமானத்திற்குள் தள்ளும் அந்த பழக்கமும் வேட்டைக்குணம் கொண்டவர்கள் தான் பெரும்பாலான ப்ளே பாய் ஆண்கள் என்கிறது உளவியல்.
ஆணும் பெண்ணும் சமமா?
ஆணும் பெண்ணும் சமமில்லை. உடல் அளவிலும் மனதளவிலும்.
மனசாட்சியும் மனிதாபிமானமும் அற்ற ஆணின் உடல் இச்சை பெண் உடல் கிடைத்ததும் தணிந்துவிடும். அதிலும் உரிமையற்ற இடத்தில் இருந்து கிட்டிய இன்பத்தை தந்தவளை தவறானவளாக எண்ண செய்யும்.
ஆனால் பெண்ணுக்கோ அப்படியில்லை, மனமுவந்து தன்னை தந்தவன் அவளுக்கு தலைவனாக காட்சியளிப்பான். மனம் அவனுக்கு அடிமையாகும்.
அவள் வீம்பை வலிய போய் தளர்த்தியவனுக்கு அவள் அடிமைப்பட்டு காலடியில் கிடப்பதென்பது காலை சுற்றிய பாம்பென நினைக்கத் தோன்றும். விளைவு அவன் கொஞ்சம் கொஞ்சமாய் விலகுவான். அவள் இன்னும் அவன் கிட்டுவதற்காய் எத்தனை அவமானங்களை வேண்டுமானால் பொறுத்துக்கொள்ள தயாராவாள்.
அவனை பொறுத்தவரை அவள் மூன்றாமவன் பெண்டாட்டி, பொழுதுபோக்குக்காக தொட்டுக்கொண்டவள். கணவனை விட்டு தன்னிடம் வந்தது போல் இன்னொருவனிடமும் செல்ல தயாராக இருப்பாள் என்ற எண்ணத்தில் உதாசீனம் செய்வான்.
தாங்க முடியாமல் நீங்கள் எல்லை மீறி அவனிடம் அடம்பிடிக்கையில் பலர் முன்னிலையில் பலவிதமாக அவமானப்படுத்தி, தோழி என்று நினைத்து பழகியதை தவறாக உணர்ந்துக் கொண்டதாகவும், கைப்பிடித்து இழுத்ததாகவும், இச்சைக்கு அவிழ்த்து காண்பித்து அழைத்ததாகவும், அவதூறுகளும் பிறர் வசைகளும் உங்களுக்கு பரிசாக கிட்டும்.
இவளோ தன்னை பலர் முன்பு பாராட்டியவன், தலை மீது வைத்து கொண்டாடியவன் கீழ்த்தரமாக நடத்துகிறானே என்று குமையும்.
அவனுக்கு நீங்கள் தேவைப்பட்ட போது நீங்கள் அவனை கண்டுக்கொள்ளாமல் தயங்கி நின்றீர்கள். அதை ஆணின் மனம் திமிர்த்தனமென என்று எண்ணிக் கொள்ளும். உங்களை வீழ்த்திய பின்பு உங்கள் மீதான வியப்புகள் எல்லாம் வெகுசாதாரணமாய் தோன்றிடும். ஆக அவன் அடுத்த வேட்டைக்கு இரை தேட ஆரம்பித்து வேறு யாரையாவது கொண்டாட போய்விடுவான். ஆக உங்களை கொண்டாடும் ஆண்களை நட்புறவில் இருந்து ஒரு அடி கூட உங்கள் அந்தரங்கத்தை நோக்கி முன்னேற அனுமதியாதீர்கள்.
நண்பனாய் லகு தன்மையோடு பழகும் பல ஆண்கள் உங்கள் அந்தரங்கத்தில் அனுமதித்த பின் வேறொரு முகம் காட்டுவர். அதில் இருந்து மீண்டு வருவதற்குள் உங்களின் இளமையின் பெரும்பகுதியை சந்தோஷமாக வாழ வேண்டிய பெரும்பான்மையான பகுதியை துக்கத்தில் தொலைத்திருப்பீர்கள்.
பெண்களுக்கு ஒன்றே ஒன்று தான் சொல்லிக் கொள்ள விரும்புகிறேன். திருமண பந்தத்தில் கிட்டாத காதலோ, காமமோ வேறு எதன் மூலம் கிட்டினாலும் உங்களுக்கு மட்டுமே அவமானம். ஆணை பொருத்தவரை அதை அவர்கள் கவுரவமாகவே கருதிக் கொள்கின்றனர். நீங்கள் மட்டுமே அவதூறுகளை வசைகளை அதிலும் சக பெண்களின் வசைகளை அதிகமாய் கேட்க வேண்டியதிருக்கும்.
சபலபுத்தி உடையவர்களிடம் இருந்து எவ்வளவு முடியுமோ அவ்வளவு எட்டி நில்லுங்கள். அன்றேல் உங்கள் வாழ்வு சருகுகளாய் உதிர்ந்து போய்விடும்.
கருத்துகள் இல்லை:
கருத்துரையிடுக